ಮತ್ತೆ ಹೊಳೆದವು ಕಂಗಳು

ಮತ್ತೆ  ಹೊಳೆದವು ಈ ಕಂಗಳು
ನಿನ್ನ ನೋಡೋ ತವಕದಿ
ಸುತ್ತ ಬಿಡಿಸ್ಯಾವೋ ರಂಗೋಲಿ
ನನ್ನ ಕಾಲ ಬೆರಳ ತುದಿ ।।

ಮುಗಿ ಮುಗಿ ಬಿದ್ದಾವೋ ರಾಶಿ ಕನಸುಗಳು
ಹೃದಯದ ಗೂಡಿನ ಅಂಗಳದಿ
ಮಿರಿ ಮಿರಿ ಮಿಂಚವೊ ನನ್ನ ಕೆನ್ನೆಗಳು
ನಿನ್ನ ನೆನೆವ ಆತುರದಿ ।।

ಆಸೆಗಳ ತಿಳಿಗೊಳದಿ ಕಲ್ಲೆಸೆದು ಗೆಳೆಯ
ರಾಡಿ ಮಾಡಿ ಹೋದೆಯಲ್ಲೋ
ಬಯಕೆಗಳು ಮುನ್ನುಗ್ಗಿ ಮತ್ತೊಮ್ಮೆ ಗೆಳೆಯ
ಮೂಡಿ ಮೂಡಿ ಬಂದೈತಲ್ಲೊ ।।

ಜೇನಂತ ಮಾತುಗಳು ದನಿಯಾಗಿ ಎದೆಯ
ಒಳಗೇ ಅವಿತು ಕುಳಿತಿಹುದು
ಏನಂತ ಹೇಳಲಿ ನನ ಮನದ ಇನಿಯ
ಇಳೆಯೇ ಸ್ವರ್ಗವೆನಿಸುವುದು ।।