ಓ ನೆನಪೇ..

ಬಂದೆ ಯಾಕೆ ನನ್ನ ಹಿಂದೆ
ಬಿಡದೆ ಕಾಡುವ ನೆನಪೆ,
ಕೊರಳ ತಬ್ಬಿ ಹಿಡಿದೆ ಉಸಿರ
... ನಿನ್ನ ಎದುರಿಸಲಾಗದೆ||

ಮರೆತೆ ಮನದ ಕರೆಯನು
ನಿನ್ನ ಕ್ರೂರ ಕುಣಿತಕೆ,
ತೊರೆದೆ ಎಲ್ಲ ಬಂಧಗಳನು
ನಿನ್ನ ಈ ಮೆರೆದಾಟಕೆ||

ನೀ ಒಮ್ಮೆ ಬರಲೆದುರು
ನನ್ನೊಡಲಿನಾ ಉಸಿರು,
ತಾ ಕರಗಿ ಕಣ್ಣೀರಾಗಿ
ಹರಿದಿಹುದು ಮಡಿಲಿಗೆ||

ಕಳೆದ ಕ್ಷಣವದು ಮರಳಿ ಬರದು
ನನ್ನ ಬೇಗೆಯ ತಣಿಸಲು,
ಕಣ್ಣ ಕಾಂತಿಯ ಮರಳಿಸಿ
ಸಿಹಿಯ ಭೋಜನ ಉಣಿಸಲು||

ದೂರಾಗು ಓ ನೆನಪೆ
ಮರಳಿ ಬಾರದಿರು,
ಈ ನೊಂದ ಮನವನ್ನು
ಕೆರಳಿ ಕಾಡದಿರು||

ರಚನೆ- ಮೇಘನಾ ಭಟ್ಟ